ECT ya electroconvulsive treatment ek mansik rogon ke ilaaj ka tareeka hai jisme kuch matra mein electricity brain mein paas ki jaati hai jisse patient ko daura (convulsions) hote hain. Ye illaj kafi purana hai aur depression, schizophrenia, catatonia jaise bimariyon ke gambhir cases mein use kiya jaata hai. ECT ko le kar kafi bhrantiyan ya galatfahmiyan logon ke mann mein hain. Movies mein bhi dikhaya jata hai ki ECT ya electroconvulsive therapy ke use se bahut nuksaan hota hai jabki vastavikta ye hai ki kuch cases mein ECT ka istemaal jeewanraksha ke jaisa hai. ECT ka istemaal halanki ab kam ho gaya hai lekin abhi bhi kuch conditions ke treatment ke liye ECT se behtaar koi aur tareek nahi hai
Q. ECT (electroconvulsive therapy kya hai?
ans – electroconvulsive therapy jisko shock therapy ke naam se bhi jaana jaata hai, maansik samasyao ke ilaaj ka ek behtreen tareeka hai. kuch maansik samasya jo lambe samay pe dawai lene se theek nahi ho pa rahi, severe depression jis mein mariz ko aatmhatya ke vichaar aa rahe ho , aisi samasyao mein ECT ki madad li jaati hai. is mein mariz ko halki dose mein behoshi ki dawai de ke, vidyut parvah (electric current) ka istemaal kiya jaata hai , jis se bas kuch samay ke liye sharir mein mirgi jaise jhatke ko paida kiya jaata hai.
ye sab padh ke ya sun ke aapko shayad ye tareeka khatarnaak lag raha hoga. par sach ye hai ECT bahut hi safe aur asardaar tareeka hai ilaaj ka.
Q ECT kaise kaam karta hai?
ans – ECT hamare dimag ke bahut saare hisso mein kuch badlaav laata hai, kuch hormones aur chemicals jinko neuropeptides, neurotrophic factors aur neurotransmitters kaha jaata hai, unke level mein badlaav laane se maansik pareshaanio ke ilaaj mein madad milta hai. ek hyperconnectivity hypothesis ke anusaar aisa bataya gya hai ki depression mein left dorsolateral prefrontal cortex mein connectivity badh jaata hai, ECT isko kam karne mein madad karta hai. ECT ek BDNF ( brain derived neurotrophic factor) naam ke padaarth ko badhaane mein madad karta hai, iske ilava serotonin aur dopamine naam ke neurotransmitters ke level mein bhi badlaav laane se ECT maansik pareshaanio ke ilaaj mein madad karta hai.
Q ECT kin conditions mein diya jaata hai?
ans – ECT bahut si maansik bimaario mein aur dimaag ki dikkaton mein dene wala ek behtareen ilaaz ka tareeka hai. depression ki dikkat jis mein insaan ko aatmhatya ke vichaar bar bar aa rahe ho, schizophrenia ya bipolar ki bimari mein agar mareez bahut jyada ugra( aggressive) ho jaaye ya dawai se khaas fayda na pahunch raha ho, aise cases mein ECT bahut kaargar saabit hota hai. ye kehna galat nahi hoga ki jyadatar maansik bimaariyo mein agar lambe samay se dawa lene pe bhi jyada fayda na mil raha ho, to ECT dene se kaafi jyada fayda mil sakta hai.
Q Kya ECT safe hai? ECT ke side effects kya hain?
ans – sun ne mein lagta hai ki ECT ya shock therapy bahut khatarnaak tareeka hai ilaaj ka, aur hamare bollywood ki movies mein bhi kuch aisa hi dikhaya jaata hai. par ye sab sach se koso duur hai. ECT bahut safe tareeka hai ilaaj ka. fir bhi kuch side effects ECT ke baad ho sakte hain jo ki jyadatar samay ke saath theek bhi ho jaate hain. kuch mareezo mein yaadaash shakti mein kamzori aana dekha gya hai ECT ke baad, jo ki kuch hafto ya mahino mein vapas theek ho jaata hai. iske ilava maaspeshio mein dard , sar dard ki samasya bhi ho sakti hai, jo ki asaani se dawai se theek ho jaati hai.
Q Kya ECT dena legal hai?
ans – ECT dena bilkul legal hai. mental health care act 2017 ke anusaar ECT ko emergency situation mein istemaal karne ka pravdhaan hai. bacho ke case mein agar jaruri ho to ECT ke liye board meeting mein faisla lene ke baad ECT di ja sakti hai. ECT ko anesthesia aur muscle relaxants dene ke baad hi diya jaata hai, jo isko ek surakshit aur behatreen ilaaj ka tareeka banaata hai.