Shalini (naam badla hua) ek 33 saal ki housewife hain jo apne pati aur bete ke saath delhi mein rehti hain. Shalini bachpan se hi safai pasand thi aur humesha apne kamre ko saaf suthra rakhti thi, dress bho saaf pehanti thi aur gandgi se duur hi rehti tha. Ghar waale kehte the ki kuch jyada hi saaf safai ka shauk hai tujhe par kabhi kisi ko kuch abnormal nahi laga. Shalini padhne mein bhi achchi thi aur unhone B.Ed ki jiske baad wo kuch time tak private school mein teacher bhi rahi.
Lagbagh 26 saal ki umra mein shalini ki shaadi ho gayi, shaadi ke baad wo housewife ban gayi. Din bhar ghar ke kaam karti thi, shaadi ke ek saal baad shalini ko pehli baar laga ki wo kuch jyada hi safai kar rahi hai. Jhaadu pocha karne ke baad bhi shalini ko aksar lagta tha ki ghar saaf nahi hai, dikhta tha ki saaf to hai par fir bhi mann nahi manta tha. To shalini ne ek tareeka nikala, unhone niyam bana liya ki do baar jhadu lagayengi aur do baar pocha. Fir bhi mann nahi mana to kuch din baad niyam ban gaya ki teen baar jhadu aur teen baar pocha. Pati ne pehli baar observe kiya aur pucha ki itna saaf safai kyun karti ho to shalini ne bahana bana diya ki dust se allergy hai, isiliye safai pasanad hun.
Par shalini ko samajh aa raha tha ki wo jo kar rahi hain, wo theek nahi hai. Ajeeb se duvidha mein fasi thi, nahi karti thi to mann bechain hota tha. Unhone decide kiya ki sunday ko jab pati ghar pe rahenge to ek hi baar cleaning karungi aur baki din jab pati office jayenge to unke aane ke pehle hi teeno baar safai kar lungi. Aisa chalta raha, issi beech shalini pregnant ho gayi aur saath mein rehne mummy aa gayi. Ghar ka kaam wo karti thi to shalini ne bhi baar safai kam kari di.
Delivery ke kuch mahine tak to sab theek raha. Par dheere dheere shalini fir pareshan hone lagi, ab safai ke saath saath unko apne haath bhi gande lagne lage, baar baar haath dhone lagi. Toilet ke time to bahut dikkat hone lagi. Toilet jaane ke baad mann mein ghinn si aati thi aur toilet ke raaste ko bhi baar baar wash karti thi. Aur uske baad apne haath to 15-20 min tak dhone padte the. Kuch dhin baat toilet use karne ke baad nahan hi shuru kar diya, mann nahi manta tha sirf haath dho ke. Aur nahana bhi lambe time tak padta tha, aksar tanki ka paani khatam ho jaata tha
Pati ghar aate the to unko dekh ke bhi lagta tha pata nahi kaisi gandi kursi pe baithe honge, metro ki seat kitni gandi hogi, haath kitne gande honge. Pati ko bola ki ghar aate hi pehle kapde badlo aur nahao aur fir baithna. Pati ko gussa aaya par shalini ko pareshan dekh ke wo maan gaye, roz aake pehle wo nahane the kapde badalte the fir bachche ko godi le paate the. Kuch dino mein ladai shuru hone lagi dono mein.
Pareshani aur badhne lagi. Shalini ko lagne laga ki subah doodh wala bell bajata hai, kundi khadkata hai, uska haath ganda hoga to shalini ne darwaza aur kundi saaf karna shuru kar diya, kooda lene wale bhaiiya ko bola ki bell nahi bajani hai, roz kuda pehle hi bahar rakh deti thi. Agar koi mehman ghar aa gaya to uske jaane ke baad saari bistar, sofa cover, farsh sab saaf karti thi.
Shalini bahut pareshan hone lagi thi. Humesha udaas rehti thi. Toilet jaane se bachti thi kyunki pata tha ki ek baar toilet gayi to 1-2 ghante se pehle wapis nahi aa paungi. Bachche ka dhyaan nahi rakh pa rahi thi, pati se rishte kharab ho rahe the, kuch samajh nahi aa raha tha. Roz raat mein soch ke soti ki kal se ye sab nahi karungi par mann nahi maanta tha. Kayi baar maan mein aata tha ki sab chor ke duur chali jayein. Logoon ke kehne par yoga shuru kiya, pooja paath bhi kiya aur ek ayurvedic goli bhi khai par kuch farak nahi pada. Padhi likhi thi to dimaag mein aaya ki ek baar doctor se mil lun par dimaag ke doctor se kaise milungi ye soch ke hi mann ajeeb sa ho gaya, log pagal bolenge, aur neend ki dawai di jayengi, zindagi bhar ke liye, ye sab suna tha aur ye soch ke ghabrahat aur badh gayi.
Aakhir mein jab halaat jyada kharab ho gaye to google mein dhooond ke ek psychiatrist ko dikhaya aur ilaaj shuru hua. Doctor ne bataya ki shalini ko OCD ki problem hai aur ilaaj ke liye medical treatment aur counselling sessions suggest kiya.
Q. OCD kya hai?
ans- OCD ka matlab hai obsessive compulsive disorder. hum ek ek kar ke isko samajhne ka koshish karte hain. obsession ka matlab hai koi ek vichaar, image jo baar baar dimaag mein aata hai. mareez ko pata rehta hai ki ye befaaltu aur bekaar vichaar hai. par chah ke bhi mareez is vichaar ko rok nahi paata hai. is vichaar ko kam karne ya rokne ke liye jo kaam kiya jaata hai usko compulsion kaha jaata hai. udhaaran ke liye jaise ki upar bataya gya hai ki shalini ke mann mein bar bar gandagi ko le ke vichaar aata tha. shalini chah ke bhi is vichaar ko rok nahi pa rahi thi, usko khud ko ye vichaar befaaltu aur galat lagta tha. is vichaar ko obsession bola jaayega. is vichaar ke sandarbh mein jo baar baar saaf safai ki jaa rahi thi usko compulsion bola jaata hai. obsession thoughts ke parkaar mein ho sakta hai, aur kai bar images ke parkar mein bhi dekha jaata hai. kai bar kuch logo ko na chahte hue bhi dimaag mein kuch tasveer aati hai , jis se unhe pareshaani hota hai. usko obsessive imagery kaha jaata hai. us tasveer ko hataane ke liye mareez kai bar mann mein hi koi kaam karta hai jaise ki ulti ginti karna ya stop bolna , isko mental compulsion ka naam diya jaata hai. religious OCD naam ki bimaari bhi dekhi jaati hai. is mein bhagvaan ke liye mann mein bure ya ashleel vichaar bar bar aate hain , ya bhagvaan ka ashleel tasveer mann mein aata hai. isko blasphemous thoughts ya imagery kaha jaata hai. kisi dharmik insaan ke liye aise vichaar aana bahut takleef dene wala hota hai aur us se kaafi pareshaani hoti hai. samay pe ilaaz lene se is samasya se chutkaara paaya ja sakta hai.
Q. OCD ki bimari kitni common hai?
ans – OCD ka bimari kaafi common hai. kuch studies ke anusaar har 100 mein se lagbhag 2-3 logo ko OCD ho sakta hai. mahilaao mein ye samasya purusho ke mukaable jyada dekhi jaati hai. aamtor pe ye samasya lagbhag 18 se 19 saal ke aas paas shuru hoti hai aur 30 saal ke baad iska shuru hona thoda asamanya hai.
Q OCD ki bimari kyun hoti hai?
ans – OCD ki bimari dimag ke kuch hisso mein gadbadi ki vajah se hoti hai. dimag ke kuch hisso mein rasaayan ( neurotransmitters ) ki maatra mein badlaav hona bhi iska kaaran maana jaata hai. dimaag mein cortico–striatal–thalamic–cortical naamak circuit mein gadbadi , aur serotonin dopamine glutamine naamak rasaayan ( neurotransmitters ) mein badlaav ko iska kaaran maana gya hai. agar parivaar mein kisi ko OCD ki samasya hai to bhi is bimari ke hone ka chance badh jaata hai.
Q OCD ka ilaaj kya hai?
ans – OCD ka ilaaj sambhav hai. iske ilaaj mein humaare paas do tarah ke options hain.
medicine aur therapy. aisa dekha gya hai ki jab medicine aur therapy dono ko ek saath istemaal kiya jaata hai to behtar nateeje milte hain. medicine mein hamaare paas SSRI naamak davaai hai jo aamtor pe istemaal ki jaati hai. iske ilaava aur bhi kaafi davaaia iske ilaaj mein istemaal ki jaati hain. yaha pe ye jaan na jaruri hai ki davaai ka asar aane mein kuch hafto se le ke mahine tak ka samay lag sakta hai. ek dava ke asar na karne pe dusri tarah ki dava ko istemaal kiya ja sakta hai.
therapy mein specially CBT jisko cognitive behavioral therapy kaha jaata hai , uska istemaal kiya jaata hai. ek khaas tarah ka CBT jisko ERP – exposure and response prevention kaha jaata hai , uska istemaal aam tor pe hota hai. maan lo agar kisi ko saaf safaai sambandhit OCD hai to ERP mein mareez ko poocha jaata hai ki kis tarah ki gandagi se usko jyada pareshaani hai, ya kon sa vichaar usko bar bar aata hai aur pareshaan karta hai. is sab ka ek list banaya jaata hai , jis mein sabse kam pareshaan karne wale vichaar se le ke sabse jyada pareshaan karne wale vichaar ko ek ek karke manage kiya jaata hai. udhaaran ke liye mareez ko gandagi wali jagah pe expose karna par safai karne se rokna , is se mareez ko samjhaya jaata hai ki agar safai nahi ki jaati to bhi kuch bada dikkat nahi hoga. dheere dheere dawai aur therapy ke istemaal se mareez mein sudhaar aata hai.
Q Kya OCD theek ho sakti hai?
ans – bilkul ho sakti hai. vigyaan ne itna tarakki kar liya hai ki aaj hamare paas OCD ke liye bahut saare ilaaj ke options hain. upar maine medicine aur therapy ke baare mein batay hai. iske ilaava aaj kal deep brain stimulation naam ki techniques bhi aa gyi hain jo mushkil cases mein madad karti hain. ismein dimag ke khaas hisse ko stimulate kiya jaata hai jis se bar bar aane wale vichaar mein kami aata hai. bahut rare cases mein surgery ka bhi istemaal kiya ja sakta hai. par sabse jaruri baat hai samay pe ilaaj lena. aisa dekha gya hai ki ilaaj mein jitna deri hota hai , OCD ya kisi bhi maansik bimaari ko theek karne mein utna hi samay lagta hai aur dawai mein lambe samay ke liye khaana padta hai. samay rehte psychiatrist se ilaaj lene se OCD theek ho sakti hai.